قۇرئان
مۇھەممەد يۈسۈپ
دىيانىتىم بۇ قۇرئان،
ئىتائىتىم بۇ قۇرئان،
ئىككى ئالەم مەڭگۈلۈك،
سائادىتىم بۇ قۇرئان.
ئورۇن ئالغان دىلىمدا،
زىكرى دائىم تىلىمدا،
ھەمراھ بولۇپ يېنىمدا،
تىلاۋىتىم بۇ قۇرئان.
دىنىمىزنىڭ دەستۇرى،
جىمى ئەلنىڭ تەقدىرى،
مۆجىزىنىڭ سەرخىلى،
كامالىتىم بۇ قۇرئان.
ئاللاھنىڭ شانلىق سۆزى،
ئىسلامنىڭ نۇرلۇق كۆزى،
ھەقىقەتنىڭ نەق ئۆزى،
ئادالىتىم بۇ قۇرئان.
ئەلگە ئىلىم ئۈگەتكەن،
نادانلىقنى تۈگەتكەن،
ئېتىقادنى تۈزەتكەن،
ساقاپىتىم بۇ قۇرئان.
چوڭ مۆجىزە ياراتقان،
ئىلىم-ھېكمەت تاراتقان،
ئەلنى ئاڭا قاراتقان،
لاياقىتىم بۇ قۇرئان.
باشلاپ گۈزەل ھاياتقا،
ئىمان بىلەن ماماتقا،
ئاخىرەتتە نىجاتقا،
كاپالىتىم بۇ قۇرئان.
لەۋزى ئەجەپمۇ چاققان،
تىلغا ھەسەلدەك ياققان،
زىكرى ھەر جايدا ئاققان،
ھالاۋىتىم بۇ قۇرئان.
مېنىڭ كۆڭۈل بايلىقىم،
چىمەنزارلىق يايلىقىم،
ھەممىدىن چىرايلىقىم،
قانائىتىم بۇ قۇرئان.
كېچە يىغلاپ رەببىمگە،
سەۋر ئەيلەپ دەردىمگە،
شىپا بولۇپ قەلبىمگە،
ئىبادىتىم بۇ قۇرئان.
ھەق، ئادالەت يولۇمدا،
قورالىمدۇر قولۇمدا،
نۇرلار چېچىپ بويۇمدا،
ماھارىتىم بۇ قۇرئان.
يېتىش ئۈچۈن مەقسەتكە،
كۆڭۈلدىكى ھەسرەتكە،
كېلىپ بىرلىك قامەتكە،
سىياسىتىم بۇ قۇرئان.
تەربىيەلەپ ئۆستۈرگەن،
شەرىپىمنى كۆتۈرگەن،
شاقاۋەتنى كەتتۈرگەن،
ئىنايىتىم بۇ قۇرئان.
غۇربەتچىلىك كۆرگەندە،
غەمكىن خىيال سۈرگەندە،
سەرگەندار بوپ يۈرگەندە،
كارامىتىم بۇ قۇرئان.
قەلەم سەھۋەن يازغاندا،
دۈشمەن توزاق قازغاندا،
مەن يولۇمدىن ئازغاندا،
ھىدايىتىم بۇ قۇرئان.
بەخت مەندىن قاچقاندا،
يىلان كۆزىن ئاچقاندا،
زەھىرىنى چاچقاندا،
سالامىتىم بۇ قۇرئان.
دەۋرىم بىر كۈن ياتقاندا،
مەن قايغۇغا پاتقاندا،
بېشىم غەمدىن قاتقاندا،
پاراسىتىم بۇ قۇئان.
ئەليۇرتىدا كەزگەندە،
غېرىپلىقنى سەزگەندە،
دىلنى ئەلەم ئەزگەندە،
ساداقىتىم بۇ قۇرئان.
ئاغرىق-سىلاق يەتكەندە،
تەندىن ماغدۇر كەتكەندە،
جاننى بوزەك ئەتكەندە،
بارائىتىم بۇ قۇرئان.
ئادالەتتىن سورغانغا،
ھەقكە تەشنا بولغانغا،
يول تاپالماي تۇرغانغا،
ئىشارىتىم بۇ قۇرئان.
كۆتۈرگۈچى شەنىمنى،
يېيىپ ئەلگە نامىمنى،
ساقلاپ چىن ئىمانىمنى،
ئىناۋىتىم بۇ قۇرئان.
قابىل كېلىپ جاھانغا،
يېتىپ بىر كۈن نىشانغا،
مەن قېنىشتا ئارمانغا،
جاسارىتىم بۇ قۇرئان.
مۈشكۈللەرنى يېڭىشتا،
زەپەر قۇچۇپ مېڭىشتا،
ھەق رىزاسىن ئېلىشتا،
شىجائىتىم بۇ قۇرئان.
چىن مۆئمىنلىك مەيداندا،
قايتماي تۇرۇپ ھەرئاندا،
بىر كۈن زەپەر قۇچقاندا،
ئالامىتىم بۇ قۇرئان.
بايان ئەيلەپ ئەرزىمنى،
ئادا قىلىپ پەرزىمنى،
تاماملاشتا قەرزىمنى،
ئامانىتىم بۇ قۇرئان.
لەھەد ئىچرە سۈرگەندە،
مۇنكىر، نەكىر كىرگەندە،
ئاڭا جاۋاپ بەرگەندە،
شاھادىتىم بۇ قۇرئان.
مەھشەرگاھقا بارغاندا،
رەببىم ھېساب ئالغاندا،
مەن چارىسىز قالغاندا،
شاپائىتىم بۇ قۇرئان.
مۇھەممەدنىڭ چىن سۆزى،
قەلىمىنىڭ بىر ئىزى،
شۇنداق دەپ قالدى ئۆزى،
شاراپىتىم بۇ قۇرئان.
1991- يىل 15-ئىيون
قاھىرە--- مىسىر
