ھەج سەپىرى

 

 تەلمۈرۈپ يىل بويى ئىنتىزار بولغان،

 ئاتلىنىپ چىقتىم بۇ شانلىق سەپەرگە.

 كىممۇ يۈرەكتىن كۆيۈپ كۈل بولمىسۇن،

 مۇقەددەس قىبلىگاھ- شۇ ئۇلۇغ يەرگە.

 

 كۆرمىگەن ئارماندا، كۆرگەنگە تىلەك،

 يانىدۇ دىللاردا ۋىسالنىڭ ئوتى.

 قانداقمۇ كۆيمىسۇن دىللار تۇرسا ئۇ-

ۋەھيىنىڭ بۆشىگى، پەيغەمبەر يۇرتى.

 

 ئىلاھىم نەسىپ ئەتكىن مۇرادىمنى

 ۋىسالىم قۇچاغلاپ كۆڭلۈم ياشارسۇن.

 يۇيۇلۇپ تاغدەك بۈيۈك گۇناھلىرىم،

 قارايغان كۆمۈردەك دىلىم ئاقارسۇن.

 

          27- 03- 1997

          ئالمۇتا- قازاقىستان