بِسْمِ اللَّهِ الرَّحْمَنِ الرَّحِيمِ
Наһайити көйүмчан, толиму меһриван Аллаһниң исми билән башлаймән
барчә һәмдусана инсанларға улуғ динни ата қилиш арқилиқ уларни дуня вә ахирәтлик бәхт-саадәткә чақирған, иман ейтқанларни өзиниң пәзли-кәрәми билән һузур-һалавәтлик һаятқа наил қилған, аләмләрниң рәбби җанаби аллаһ таалаға хастур. аллаһ таалаға мәвҗудатниң саничә һәмдусана ейтимән. һәқ динни инсанийәткә йәткүзүш арқилиқ уларни куфри, залаләт вә азғунлуқниң қараңғулуқлиридин қутулдуруп, иман, һидайәт вә һәқиқәтниң нуриға йетәклигән сөйүмлүк пәйғәмбиримиз һәзрити муһәммәд әләйһиссаламға дурут , дуа вә саламлиримни йоллаймә. униң аилә - тавабиатлириға вә қиямәткә қәдәр униң йолини давамлаштуриған муминләргә мәңгүлүк аманлиқ тиләймән.
дуняда һәрқандақ инсан бәхт-саадәт издәйду вә өмрини мәнилик өткүзүшни халайду. чүнки, бизгә берилгән бу һаят толиму қисқа болуп, мәнисиз өткүзүш уни техиму қисқартиветиду. һаят баштин ахир җапа вә синақлар билән толған болуп, һаятниң түрлүк- түмән җапа-мушәққәтлири вә дәрд-әләмлири алдида қәддини рус туталиған вә қәлб қатлиридин күләлигән, миннәтдарлиқ билән сәврчанлиқта йетилгән адәм өзини вә башқиларни бәхтлик қилалайдиған адәмдур. чүнки, бизниң йолбашчимиз вә үлгимиз һәзрити муһәммәд әләйһиссалам мундақ дәп көрсәткән: "мумин адәмниң иши һәқиқәтән әҗәблинәрлик. униң һәммә иши яхшилиқтур, бу яхшилиқ мумин адәмдин башқисиға несип болмайду. униңға бирәр яхшилиқ йәтсә шүкүр қилиду, бу униң үчүн яхшилиқтур, бешиға хапилиқ кәлсә сәвр қилиду, буму униң үчүн яхшилиқтур".
пеқир бәхт-саадәтниң сирлири, хушаллиқниң ачқучлири һәққидә вә қандақ қилғанда һаятимизни мәнилик вә бәрикәтлик өткүзгили болиду, дегән темида йилларчә издәндим, нурғун китабларни оқудум вә өзүмни йетиштүрүшкә тириштим. шуниң билән бир вақитта билгәнлиримни хәлқим билән ортақлишишқа вә һаят дәрслиридин биргә пайдилинишқа интилдим.
һөрмәтлик оқурмән! қолиңиздики "һаятиңизни қәдирләң" дегән бу әсәр буниңдин бурун нәшр қилинған "бәхт-саадәтниң 40 ретсипи", "һаятниң пәйзини сүрүң", "әңгүштәр" намлиқ әсәрлиримниң давамидур.
җанаби аллаһ тааладин бу аддий рисалини хәлқим үчүн мәнпәәтлик қилип беришини вә бу әмгикимниң әҗир- савабидин пеқирни вә ата-анамни бәһримән қилишини тиләймән.
__ муһәммәд йүсүп муһәммәд турсун
2025 ـ йил 12 ـ июл, истанбул ـ түркийә. |
